Уңыш бәйрәме!

6 октябрь көнне район мәдәният йортында Авыл хуҗалыгы һәм эшкәртү сәнәгате хезмәтчәннәре көне уңаеннан зур тантана үткәрелде. Анда икмәк язмышы өчен көнне-төнгә ялгап эшләгән, районыбыз кырларында үскән 2020 ел ашлыгын түкми-чәчми җыеп алган фидакарьләр җыелды.

Тантана барышында район башлыгы Энгель Фәттахов әлеге тармак хезмәтчәннәренә, лаеклы ялдагы ветераннарга еллар дәвамында башкарган тынгысыз, җаваплы хезмәтләре өчен рәхмәт сүзләрен ирештерде.

Чарада катнашучылар хозурына “Агыйдел” дәүләт җыр һәм бию ансамбле чыгышлары, театральләштерелгән тамаша тәкъдим ителде. Һәр котлау җыр-бию белән үрелеп барды.