Яшәүдән ямь табып

Пөхтә, матур җыештырылган тыйнак кына йорт. Һәр тарафтан җылылык, яктылык нур булып сирпелә. Рәвилә һәм Дәниф Даяновлар яши әлеге йортта.

Рәвилә апа Аккүз авылында дөньяга килгән. Мәктәпне тәмамлагач, колхозда эшкә кала. Тик яшь, чибәр, чая кызның күңеле каядыр ашкына, яшьлек хисләре еракка дәшә. 1961 елда ул Актанышка күчеп килә һәм трахома- күз авыруы буенча шәфкать туташы булып эшләү өчен укырга керә. Ул елларда андый авыру күп таралган була. Укуын тәмамлагач, аны Яңа Солтангол авылына эшкә җибәрәләр. Бераздан зур авылга - Яңа Әлем медпунктына күчерәләр. Эшен яратып, сөенеп башкара ул. Анда эшләгәндә Дәниф абый Даянов белән танышып, 1962 елда гомерлеккә кушылып, яңа тормыш башлыйлар.