Татарстанда соңгы тәүлектә коронавирус инфекциясе йоктыруның 54 яңа очрагы ачыкланган

(Казан, 9 июнь, «Татар-информ»). Татарстанда соңгы тәүлектә яңа төрдәге Covid-19 коронавирус инфекциясе йоктыруның 54 яңа очрагы ачыкланган. Аларның барысы да диярлек моңа кадәр коронавирус эләктергән кешеләр белән аралашкан, бер кеше генә чирне чит илдә йоктырып кайткан. Бу хакта «Татар-информ» агентлыгына ТР Президентының матбугат хезмәте җитәкчесе Лилия Галимова хәбәр итте.

«12 кеше хастаханәгә озатылган, калган 42 кеше өендә дәвалана», - диде Галимова.

Инфекция йоктырган 18 кеше — 30-50 яшь аралыгында, 14 кеше — 50-60 яшь аралыгында.

Коронавирус йоктыручыларның күбесе Казанда (35 кеше) һәм Чаллыда (10 кеше) ачыкланган. Татарстанның 9 районында берәр кеше әлеге чирне эләктергән.

Эпидемия башланганнан алып республикада яңа төрдәге Covid-19 коронавирус инфекциясенең барлыгы 3665 очрагы теркәлгән, шулар арасында 2748 кеше (шул исәптән 35 кеше – узган тәүлектә) терелгән. 906 кеше дәвалануын дәвам итә.

https://tatar-inform.tatar/news/health/09-06-2020/tatarstanda-so-gy-t-lekt-koronavirus-infektsiyase-yoktyruny-54-ya-a-ochragy-achyklangan-5748547