Шәрәфетдинова: М12 автотрассасы ТРда кунакханәләр һәм кафелар төзүгә этәргеч бирәчәк

М12 тиз йөрешле автомобиль юлы төзелеше бизнес өчен яңа мөмкинлекләр тудырачак, Татарстанда яңа кунакханәләр һәм кафелар барлыкка килүгә китерәчәк. Бу хакта «Татар-информ» мәгълүмат агентлыгына республиканың рестораторлар һәм отельерлар ассоциациясе башкарма директоры Галина Шәрәфетдинова хәбәр итте.

«Проект бик масштаблы, аның Көнбатышны Көнчыгыш белән тоташтыруын исәпкә алып. Регионнар арасында гына түгел, илләр арасында да яңа логистика юллары барлыкка киләчәк. Рестораторлар буларак, безгә килгәндә, бу юл буе хезмәт күрсәтү станцияләре, аерым торучы кафе, юл буе отельләре барлыкка килүгә китерәчәк. Болар барысы да бизнес өчен өстәмә ярдәм булачак,чөнки юллар монсыз булмый. Автоюл барлыкка килү белән безне яңа бизнес булдыру өчен яңа мөмкинлекләр көтә", - дип билгеләп үтте Шәрәфетдинова.

Ассоциация башлыгы шулай ук юл буе инфраструктурасы төзелешенә кертелгән инвестицияләрнең чыгымнары кире кайтуны бәяләде. "Юлның үткәрүчәнлеген һәм торак пунктларга якын булган нокталарны исәпкә алып, трафикны санарга мөмкин. Бу бизнесны аклый алачак», — дип тәмамлады Галина Шәрәфетдинова.

М12 автотрассасын 2024 елга төзеп бетерергә планлаштыралар, ул республиканың биш районы биләмәсендә узар дип көтелә. Автомобиль юлының гомуми озынлыгы 729 км тәшкил итәчәк, шул исәптән 142 км — Татарстанда. Магистральне төзегәндә республикада биш зур чишелеш, шулай ук ясалма корылмалар һәм кичүләр төзү планлаштырыла. Шулай ук дүрт тукталыш комплексы каралган.