Имам-мөхтәсиб сайланды

Актаныш районы мөхтәсибәтенең чираттагы утырышы 11 октябрь көнне "Яшьлек" мәдәни үзәгендә узды. Аның эшендә муниципаль район башлыгы Фаил Камаев катнашты. Утырышны Чаллы мөхтәсибәте имам-мөхтәсибе, ТР Мөселманнар Диния Нәзарәтенең президиумы әгъзасы Әлфәс хәзрәт Гайфуллин алып барды. Ул Мөфти Камил хәзрәт Сәмигуллинның фәтвәсен җиткерде һәм 24 авыл имам-хатыйбына эшләү өчен шәһадәтнамә, күкрәк билгесе һәм мөфти исеменнән изге Корьәннең татарчага тәрҗемәсен - тәфcирен тапшырды. Утырышта, аннан соң, районның имам-мөхтәсибе Ләес хәзрәт Галләмовның, сәламәтлеге какшау сәбәпле, эштән китү турындагы гаризасы канәгатьләндерелде. Актаныш районы имам-мөхтәсибе итеп, бертавыштан, Руслан хәзрәт Мортазин сайланды.