Юньлелеккә илтмәүче чирдән сакланырга кирәк

Балаларга һәм яшүсмерләргә бу адымга басу өчен күп кырлы хәбәрдарлык чорында яшибез.  Кирәкмәгән мәгълүматның киң таралышы, яшь буынны начарлыкка җәлеп итү – тормышыбызның тискәре якларының берсе.
Балаларга һәм яшүсмерләргә аңлату, бу чирләрдән саклану максатыннан, 23 ноябрь көнне Татар Ямалы авылы мәдәният йортында файдалы сөйләшү булып узды. 
Әңгәмәгә район балалар һәм яшүсмерләр наркологы Ленар Минхуҗин, җирлек участок полиция хезмәткәре, өлкән лейтенант Ленар Хәбибуллин, балигъ булмаган балалар белән эшләү инспекторы, лейтенант Эльза Гыйльфанова чакырылган иде. Шулай ук очрашуга Татар Ямалы гомуми белем бирү мәктәбе директоры Гөлназ Фәйрушина, директор урынбасарлары Рушания Шәймөхәммәтова, Эльвира Рәхмәтуллина, авыл фельдшеры Гөлсинә Хафизова, ата-аналар да килде.
Ленар Сәүбән улы наркотикларның һәм спиртлы эчемлекләрнең кеше организмына булган зыяны, наркотикларның төрләре турында сөйләп үтте. Соңгы вакытта, аеруча, синтетик наркотиклар ясалуның киңәеп киткәнлеген, әлеге төр психотроп матдәнең киләчәк буынны юкка чыгару куркынычы турында аңлатты. Шулай ук яшьләр арасында танылган бер блогер, реперның балаларга һәм яшүсмерләргә начар тәэсире турында мисаллар китереп сөйләде. 
Ленар Минхуҗин андроидларда 
озаклап утыручыларның телефонга бәйлелеген наркомания чире белән бер дигән фикерен дә әйтте. Әлеге афәтләргә эләкмәс өчен, ата-ананың балаларга игътибарлы булуын, контрольдән чыгармауны, алар белән бергә күбрәк саф һавада йөрүне, аралашуны, сәнгать һәм спорт түгәрәкләрендә шөгыльләнүне тәкъдим итте.
Җирлек участок полиция хезмәткәре Ленар Әһлиулла улы, наркотик һәм спитрлы эчемлек куллану аркасында, җәмгыятькә килгән зыян турында сөйләде. Яшүсмерләрнең хокук 
бозган очракта нинди җаваплылыкка тартылачагын аңлатты, законнар белән таныштырып үтте. Ундүрт яшькә кадәр хокук бозган баланың бар җаваплылыгы ата-ана җилкәсенә төшүен, уналты яшьтән яшүсмернең җаваплылыкка үзе тартылуы, исәпкә басуның киләчәк тормыш өчен киртә булуын сөйләде. 
Полиция хезмәткәре Татарстанда дини агымнар күбәюен, ләкин традицион ислам диненә каршы оешкан идеологик агымнарның бездә юклыгын әйтсә дә, шәһәрләргә укырга кергән балаларның әңгәмәдәшләре ышанычлы кеше булуына төшенергә кирәклеген искәртте.
Балигъ булмаган балалар инспекторы Эльза Айдар кызы кичке вакытта балаларга һәм яшүсмерләргә чикле сәгать куелуын, әлеге чикләүнең балаларны, ата-аналарны күп бәладән саклавын аңлатты. 
Эльза Гыйльфанова район статистикасы белән дә таныштырды. Интернет челтәрендәге мошенникларның, танылган җырчылар, блогерлар исеменнән ясалган фейк аккаунтларның  балаларга аңлашылмаслык адымнар ясарга этәргеч булуын да сөйләде. 
Очрашуда яшь буынның хокукларын саклау, иминлеге турында да сүз барды. Шул ук вакытта коронавирустан саклану чараларын куллану, гигиена таләпләрен үтәү, бер-беребезне саклау турында да кызыклы фикерләр әйтелде. 
Белгечләр белән очрашып, шушындый чараларны ешрак уздырылуы барыбыз өчен дә кирәк дигән фикердә калдык.