Тамчыдан күл җыела

Актаныш районында энергияне саклау тотрыклы киләчәккә бер адым ул

Актаныш районы администрациясе Татарстан хөкүмәте тарафыннан алып барылучы энергияне саклау буенча берничә программада катнаша. «Энергияне саклаучы Татарстан» проекты кысаларында районда авыл урамнарын яктырту системасы модернизацияләнә. 500дән артык гадәти лампа, энергияне саклаучы LED-лампаларга алмаштырылды, бу энергия куллануны 40 процентка кадәр киметергә ярдәм итте.

Социаль учреждениеләрдә кояш панельләрен кулланылышка кертү дә мөһим адым булды. Мәсәлән, бер авыл мәктәбендә гибрид энергия системасы урнаштырылды, ул бинаны болытлы көннәрдә дә энергия белән тәэмин итә. Бу коммуналь хезмәтләргә чыгымнарны киметү белән бергә, экологиянең нигезләрен өйрәнүче укучылар өчен дә яхшы тәҗрибә үрнәге булып тора.

Халык роле: кечкенә адымнар зур нәтиҗәгә китерә

Энергияне саклау һәрбер йорттан башлана. Районда төзекләндерүче белгечләр тарафыннан тәрәзәләрне җылыту буенча мастер-класслар уздырыла, электр приборларын рациональ куллану буенча язмалар таратыла. Актаныш авылында яшәүче Гөлнара Сафинаның сүзләренә караганда, гадәти лампаларны LED-лампаларга алмаштырганнан һәм дифференциал тарифлы счетчиклар куйганнан соң, аларның гаиләсе электр энергиясенә чыгымнарны 30 процентка киметкән.

«Элек энергиянең күп өлеше бушка югала икәнен уйламаган идек. Хәзер телевизор, компьютер, телефон зарядкасы кебек электр техникаларын кулланмаганда шнурларын розеткадан аерабыз, табигый яктыртуга өстенлек бирәбез. файдаланабыз. Бу гади, әмма нәтиҗәле гамәлләр», — дип үз тәҗрибәсе белән бүлешә Гөлнара.

Экология һәм экономия

Энергияне саклау турыдан-туры экологиягә дә тәэсир итә. Район администрациясе мәгълүматлары буенча, соңгы ике ел эчендә Актаныш районында CO2 чыгарулар 15 процентка кимегән. Энергияне саклаучы технологияләргә күчү «Экология» милли проекты максатларына ирешүгә зур өлеш кертә.

Дәүләт ярдәме: һәркем өчен мөмкинлекләр

Район халкы энергияне саклаучы технологияләрне кертү өчен дәүләт субсидияләрен һәм льготалы кредитлардан файдалана ала. Мәсәлән, «Яшел йорт» программасы кояш коллекторлары яки җылылык насослары урнаштыру чыгымнарын 50 процентка кадәр каплый. Авыл хуҗалыгы предприятиеләре өчен җиһазларны модернизацияләү өчен грантлар билгеләнгән.

Энергияне саклау буенча экспертлардан киңәшләр

1. Гадәти лампаларны LED-лампаларга алмаштырыгыз.

2. Тәрәзәләрне һәм ишекләрне җил үтәли йөрмәслек итеп җылытыгыз — бу чыгымнарны киметергә ярдәм итәр. 

3. А+ энергия класслы көнкүреш техникасын кулланыгыз.                                                                                   "А+" һәм "А++" энергия куллану класслары - көнкүреш приборларының энергия нәтиҗәлелегенең иң югары күрсәткечләре. Мондый маркировка 2011 елдан башланды. Энергия куллану нәтиҗәлелегенең Адан алып G га кадәр 7 классы бар. Иң күп энергия сарыф итүче приборлар G классына керә. Бу техника үзенә йөкләнгән функцияләрне башкару өчен күп электр энергиясе сарыф итә дигән сүз. 

4. Күптарифлы хисаплагычлар урнаштырыгыз.

Тамчыдан күл җыела, ди татар халык мәкале. Әлеге киңәшләр сезгә энергия куәтен сакларга ярдәм итәр.