Батырларга хат: Гаилә мәктәбендә Актаныш, Богады һәм Яңа Әлем укучылары мөһим акциядә катнашты

Үзе дә мәктәп укучыларыннан чак кына зурырак солдат Ихтыяр Биктимиров белән күрешү кызларга -егетләргә аеруча кызыклы булды. Ихтыяр Гали улы Нурлат районында туып-үсә.  

6 нчы сыйныфта укыганда гаиләләре белән Актаныш районының Күҗәкә авылына күчеп киләләр. 9 еллык мәктәпне тәмамлагач Ихтыяр Актаныш технология техникумында укып һөнәр ала.

Студент елларында Ихтыяр тормыш тәҗрибәсе туплый, Актанышның Җәмигъ мәчетенә йөри, остазы Руслан хәзрәт Мортазиннан ислам дине кануннарын өйрәнә. «Хәрби хезмәт вакытында дини гыйлем миңа бик ярдәм итте», ди Ихтыяр.

Бигрәк тә махсус хәрби операция зонасында вакытта догалар укып күңеленә тынычлык тапкан. Ислам дине сабыр булырга куша, «Нәкъ менә түземлек, сабырлык бик күп вакыйгаларны исән-сау кичеп чыгарга көч бирде, киләчәккә якты ышаныч уятты», дип дәһшәтле мизгелләрне искә төшерде Ихтыяр.

Ватаныбыз сакчысы, Күҗәкә авылы егете Ихтыяр Биктимировка ЗАГС бүлеге мөдире Гөлфинә Мөхәммәдиева «Татар дөньясы» китабын бүләк итте.

Ихтыяр Гали улы 2022 елның 23 ноябрендә Россия армиясе сафларына алына. Мәскәүдә хәрби өйрәнүләр уза, киләчәк һөнәрен дә шушы юнәлештә сайларга ниятли, бертуган ике абыйсының контракт төзеп хәрби хезмәтләрен дәвам итүе дә моңа этәргеч ясый. 2023 елның 6 маенда якташыбыз контракт төзи. Нәкъ бер елдан, 2024 елның 17 маенда Ихтыяр  махсус хәрби операциягә җибәрелә. Декабрь ахырына кадәр Украинада неонацизмга каршы көрәшә. Туган ягыбыздан дәрт-дәрман, көч-куәт җыеп шушы көннәрдә янә хәрби хезмәткә китәргә җыена ул.

Коръән Кәримдә: «Ватанны яклау иманның бер өлеше булып тора», – диелә. Бу турыда пәйгамбәребез Мөхәммәд (сгв) тә үзенең хәдисләрендә күп мәртәбә искә ала. «Ватаныңны, туган урыныңны ярату – иманнан», – ди. Без Ватаныбыз, туган җиребезне яратырга гына түгел, якларга да тиеш. Расүлебез: «Һәр мөселман, һәр ир-ат туганнары, якыннары өчен җавап бирүче», – дигән. Әгәр дәһшәтле сугыш башланса, ул Ватанын, гаиләсен саклап көрәшергә бурычлы. Пәйгамбәребез: «Һәр мөселман атта йөри, уктан ата белергә һәм физик яктан нык булырга тиеш», – дип тә искәртә. Тагын бер хәдисендә: «Көчле мөселман зәгыйфь мөселманга караганда хәерле. Аллаһ Тәгалә аны ныграк ярата», – дип белдерә. Хәрби хезмәткә бару, Ватанны яклау – ислам дине күзлегеннән саваплы эш.

Бу хакта Руслан хәзрәт Мортазин укучыларга менә шундый тәрбияви чыгыш ясады. Үзара дусларча мөнәсәбәттә булырга, бер-береңнең яман якларын башкаларга сөйләмәскә, бер-береңне Аллаһ хакы өчен хөрмәт итәргә өндәде. 

Фәһимә Шәйгәрданова да хәзрәтебез фикерен дәвам итте. Булганга канәгать, шөкер итә белгәннәргә бәхет капкалары ачылу турында тормыш язган хикәяләрне мисал итеп китерде. Балаларны хезмәт сөяргә чакырды, физик эш эшләмәгән, спорт белән шөгыльләнмәгән кешеләрдә агрессия хисләренең көчәюен мисаллар белән аңлатты.

Һәм әлбәттә, тормышта бәхетле булу серләрен ачты: яхшы һөнәр һәм яхшы гомер юлдашы сайлау үткәннәргә үкенмәслек итеп яшәргә зур этәргеч.

Ватанны саклаучылар көне алдыннан Актанышның икенче санлы мәктәбе, Богады һәм Яңа Әлем мәктәпләре укучылары барлык чыгыш ясаучыларны, аеруча Ихтыяр Биктимировның съзлщрен зур кызыксыну белән тыңладылар. Ветеран сугышчыга сораулар бирделәр.

Яшьләр өчен дәрестә истә кала торган мизгел- «Батырларга хат» акциясендә катнашу булды. 

«Батырларга хат» акциясе Татарстан Республикасы Министрлар Кабинетының ЗАГС Идарәсе тарафыннан гамәлгә куелган зур проект. Гаилә мәктәбе дәресендә катнашучы һәр бала бүген Актаныш районыннан махсус хәрби операциядә катнашучыларга атап язылган котлау тәбрикнамәләренә имзаларын салды.  

- Махсус хәрби операциядәге якташларыбызның туган ягыбызга исән-сау кайтуларын теләп калабыз. Ир-егет-гаиләнең тоткасы, гаиләләребезнең терәге булган барлык көчле затларны, егетләрне Ватанны саклаучылар көне белән котлыйбыз. барыбызга да гаиләләребез бөтен булып матур итеп яшәргә язсын,- диде ЗАГС бүлеге мөдире Гөлфинә Мөхәммәдиева.