ХЕЗМӘТЕГЕЗ ӨЧЕН РӘХМӘТ: Айзат Заманов

- 2004 елда 4-5 мең гектар сөрем җире булган "Әнәк" хуҗалыгында хезмәт юлымны башладым. Соңыннан агрофирма булып оешты. Сөрем җирләре артты. Агроном хезмәте хуҗалыкта иң кирәкле һөнәрләрнең берсе дип исәплим. Чөнки беренче чиратта игенчелек тора. Калган барлык тармаклар да игенчелеккә бәйле. Игенчеләр, агроном кышын ял итә дисәләр дә, алай түгел ул. Ел уңышы өчен кыштан ук әзерләнә башлыйбыз. Орлыкларны, техниканы әзерлибез, уйланабыз, тикшерәбез. Быел шикәр чөгендере игеп карадык. Һәм уңышыннан бик тә канәгатьбез. Киләсе елга аның мәйданнарын тагын арттырырбыз дибез. Барлык агрономнарга хезмәтләрендә уңышлар телим. Ел саен мул итеп игеннәр үстерергә, аларны исән-имин җыйнап алып, уңышы белән сөенергә язсын.