“Алга“ алга барамы?

"Алга" хуҗалыгы алга барамы? Әлеге сорауга җавапны бер мин генә түгел, район авыл хуҗалыгы идарәсендә дә, хакимияттә дә күптән эзлиләр. Дөресен әйткәндә, хуҗалык исеменә тап төшерми. Кискен үзгәрешләр булмаса да, еллар дәвамында җыелган хәл ителәсе мәсьәләләр, бурыч арбасын тартып бара ул.

Шәхсән үземә, шушы көннәрдә район башлыгы вазифаларын башкаручы Фаил Камаев җитәкчелегендә Чуракай авыл җирлегендә узган еллык исәп-хисап җыелышыннан соң шулайрак тоелды. Дөрес, башкарасылар әле шактый. Ә иң әүвәл, җитәкчеләр алышынган саен, кулдан-кулга күчеп килгән бурычлардан котылу шарт. Бүгенге көндә алар җәмгысе 58 млн. сум тәшкил итә. Фаил Мисбах улы әлеге мәсьәлә буенча, хуҗалыкта аерым тармакларны оптимальләштерми, сакчыл эш алымнарын үз итми нинди дә булса уңай үзгәреш көтү урынсыз икәнен ассызыклады.